Bakeaz berba egin ez izana aurpegiratu diote euskal alderdiek Rajoyri

Josu Erkoreka EAJko bozeramaileak Mariano Rajoy kritikatu du, inbestidura ekitaldiko mintzaldian ez baitu ETAk jarduera armatua bukatutzat eman osteko egoeraz hitz egin. Gai hori bere mintzaldian azalduko duela esan du Erkorekak.

Ildo horretan, Erkorekaren esanetan, "ustekabe txarra" izan da Rajoyk inbestidura ekitaldiko hitzaldian bakegintzari buruz hitz egin ez izana.

Mariano Rajoyk inbestidura-eztabaidan egin duen hitzaldiaren ostean Erkorekak hedabideei adierazi dienez, beldur da Gobernu berriak krisi ekonomikoa autonomia estatutuekin "tabula rasa" egiteko eta autonomien esku zeuden erantzukizunak berreskuratzeko erabiliko ote duen.

EAJko bozeramailearen hitzetan, Rajoyren hitzaldiak "uste txarrenak" baieztatu ditu.

Ildo horretan, Rajoyk gauza "zehaztugabe eta anbiguoak esaten" jarraitzen duela kritikatu du EAJren ordezkariak.