Bakearen aldeko Koordinakundeak 'biktima guztiak' omendu ditu

Igande honetan Bilbon izandako Biktimei Elkartasuna adierazteko XII. Ekitaldian "biktima guztiak" omendu ditu Euskal Herriko Bakearen Aldeko Koordinakundeak, "Estatuen gehiegikerien ondorioz izandako biktimak" barne. 'Oroimenerako lekuak' lelopean izandako omenaldi honetan, "Estatuek erangindako biktimak" aintzat hartzea "eraikitzeko lan" gisa definitu du.

Halaber, Gernikako Akordioaren sinatzaileek larunbat honetan egindako deklarazioari buruz Jesus Herrero Euskal Herriko Bakearen aldeko Koordinakundeko presidenteak "gutxiegi" dela esan du. Honen esanetan, "ohiko ezker abertzaleak erantzunkizun zehatz bat hartu behar du bere gain, urte askoz indarkeria terrorista zuritu duelako".

Ehun lagun inguru bildu dira bertan, tartean, Rodolfo Ares Herrizaingo sailburua, Maixabel Lasa Biktimen Eusko Jaurlaritzako Zuzendaritza arduraduna, Iñigo Iturrate EAJko legebiltzarkidea edo Julia Madrazo EBko ordezkaria. PPko ordezkaririk ez da bertan izan, "koordinazio akats" batengatik izan bada ere. Hori dela eta, elkartasun osoa erakutsi dio ekitaldiari.

Josu Cepedak eta Lourdes Oñaderrak irakurritako testuan azaldu duenez, "errazagoa da korapilo bat egitea desegitea baino". "Azken 50 urtetan gure elkarbizitza oztopatu duen fanatismoaren korapiloak ito gaitu eta gure askatasunaren ur purua zorrozkeriaren hobitik bota dute", azpimarratu dute. Hori dela eta, "indarkeria erabili eta zuritu dutenei exijentzia maximoa" eskatu dute, "besteei mina eragin dieten bakarrak direlako".

"Indarkeria gainditzearekin batera, gizarte zuzenago bat eraikitzen ari gara", adierazi dute. "Guztiak" hartzen dituen oroimen honi esker, sufrimenduarekiko sentsibilitatea publikoki erakutsi dezakete eta horrek "legez kanpoko indarkeriaren erabilera" errefusatzeko jarrera indartzen du.