ETAko presoek onura legalak izan ditzaketela esan du Cabiecesek

Mikel Cabieces Espainiako Gobernuaren EAEko ordezkariak bat egin du lehendakariaren proposamenarekin eta euskal presoak hurbiltzearen alde agertu da, izan ere, "ETA existitzen ez bada, presoak ez dira ETAko presoak izango", orduan "preso normalak" izango dira eta beste edozeinen tratamendu bera jaso behar dute, haren esanetan.

Radio Euskadin egin dioten elkarrizketa batean azaldu duenez, Gobernuak ez du ETAren amaiera negoziatu, agerian geratzen da hori ezker abertzaleak eta ETAk emandako pausoak eta hartutako erabakiak "alde bakarrekoak izan direla" diotenean.

Cabiecesek uste du PSOEren Gobernuaren terrorismoaren kontrako borrokarengatik hartu duela ETAk erabakia. "Poliziaren eraginkortasuna" dela eta, ETA "ahuldu" eta "gehiago ez hiltzea" erabaki duela azpimarratu du Cabiecesek.

Hala ere, ETAren zuloetan lehergailuak eta armak dauden bitartean Segurtasun Indarrek lanean jarraituko dutela zehaztu du.