Politika -
Legebiltzarreko hauteskundeak
Urizarren iritziz, 2013a baino lehen egingo dira hauteskundeak EAEn
EAko idazkari nagusiak adierazi du PPk PSE-EEri "presioa" egiten jarraituko duela, eta honenbestez, sozialistek egoera horrekin jarraitzeak merezi duen ala ez aztertu beharko dutela.
Erredakzioa
Pello Urizar EAko idazkari nagusiaren ustez, "2013a baino lehen izango ditugu hauteskundeak" EAEn. PPk PSE-EEri "presioa" egiten jarraituko duela iritzi dio, eta honenbestez, sozialistek "agonia politika" horrekin jarraitzea interesatzen zaien erabaki beharko dutela adierazi du. Urizarren ustez "PPren mende dagoen txotxongilo Gobernua" da eta jada "Madrilen babesik ez du".
Herri Irratiari eskainitako elkarrizketa batean hauteskundeak aurreratzeko aukera "PPren esku" egongo dela esan du Urizarrek. Hala, astelehen honetan Iñaki Oyarzabal PPko ordezkariak horren inguruko "zantzua" erakutsi zuela esan du eta horrez gain Carlos Aguirre Ekonomia sailburuak esandakoa gogoratu du, "Patxi Lopez oso bakarrik sentitzen dela", alegia.
Horren ustez, Zapaterok hauteskundeak aurreratzeko kalkuluak sei hilabete gehiago itxaronez gero, kolpea handiago izango zela pentsatuta egin zituen, eta Patxi Lopezi "berdina" gerta dakiokeela esan du.
PSE-EEk "normaltasun politika batean, batzuekin eta besteekin akordioetara helduko dela badakiela" esan du EAko idazkari nagusiak, baina hori gertatzeko "Eusko Legebiltzarrean ordezkaritzak normalizatuta egon behar du", erantsi du.
PPrekin duen harremanaz galdetuta, berriz, bi alderdien arteko ordezkarien arteko bilera "beranduen jota datorren astean egitea" espero duela esan du, nahiz eta oraindik data jarri gabe egon.
