Mugimendu politikoak Nafarroan, hauteskundeei begira

Hiru hilabete falta dira hauteskunde orokorrak egiteko, eta Nafarroako alderdiak mugitzen hasi dira dagoeneko, aliantza berriak prestatzen.

Mugimendu horietako lehena Aralarrek egin zuen joan den astean. Izan ere, Nafarroa Bai koalizioa utzi eta Bildurekin bat egitea erabaki zuen.

NaBai 2007an sortu zuten EAJk, EAk, Aralarrek, Batzarrek eta independenteek. 2011ko martxoko hauteskundeetan Aralarrek, EAJk eta independenteek baino ez zuten errepikatu, EA Bildun baitago, eta Batzarrek Ezker Batuarekin bat egin baitu.

Horrenbestez, une honetan, oraingoz behintzat, EAJk eta independenteek baino ez dute osatzen Nafarroa Bai koalizioa. Besteak beste, Uxue Barkos diputatu eta Iruñeko zinegotzia dago independenteen artean.

Nolanahi ere, alderdi ezkertiarrak ez dira mugitzen ari diren bakarrak. Bilduren garaipenaren beldur, Yolanda Barcina UPNko presidenteak aliantza egitea eskaini dio PPri, eta Santiago Cervera buru duen alderdia negoziatzeko prest agertu da.

Foru Erkidegoan PSNrekin batera gobernatzen du UPNk, baina Madrilen PPrekin egon nahi du.

PSN "harrituta" agertu da balizko aliantza horren aurrean, eta Barcina sozialisten aurrean hauteskundeak galtzeko beldur dela uste du.

Testuinguru honetan, baina, badirudi UPN barruan guztiak ez daudela ados PPrekin aliantza egitearekin. Adibidez, Miguel Sanz presidente ohia zerrendaburu izateko prest agertu da... baldin eta PPrekin batera aurkezten ez badira.