Sorturen komunikatuaren inguruko erreakzio politikoak

Sortuk indarkeria errefusatu izana "albiste ona" dela adierazi du Jose Antonio Pastor PSE-EEk Legebiltzarrean duen bozeramaileak eta "norabide onetik" doazela gaineratu du. Bere ustetan Espainiako Gobernuak eta Jaurlaritzak terrorismoaren arloan duten "politika, estrategia eta kudeaketa" berresten ditu.

Sortuk komunikatuan azaldu duen jarrerak demokraziaren exigentzia politikoak funtzionatzen duela esan du eta "mundu honi politika egiteko ahotsa eta hitza baino ezin direla erabili ikusarazi diote", adierazi du Pastorrek.

Leopoldo Barreda PPren Legebiltzarreko bozeramaileak, berriz, Sorturen komunikatua udal hauteskundeetan sartu ahal izateko beharraren adierazpena baino ez dela azaldu du.

Barredak azpimarratu du helburu demokratikoa ETArekin betirako amaitzea dela eta hori dela "axola duen eztabaida". Bere esanetan, "talde terroristaren amaiera lortzeko hauteskundeetan ETAren oinordekorik ez egotea nahitaezkoa da".

Sortuk ETAk lehendakariaren kontra planeatutako atentatua baztertu izana ezker abertzaleak bide politikoa jarraitzeko egindako apustuaren "beste baieztapen bat" dela gaineratu du Juanjo Agirrezabala EAko legebitzarkideak. Orain, alderdi berriaren "legez kanporatzea justifikatzeko inolako argudiorik ez dagoela", adierazi du.

Agirrezabalak azaldu du ezker abertzalearen apustuaren inguruan inoiz ez duela zalantzarik izan. Eta esan du gertakariek "arrazoia eman" diotela EAri.

Mikel Arana Ezker Batua-Berdeaken koordinatzaile nagusiak eta legebiltzarkideak, Estatuaren Abokatutzak eta Fiskaltzak Auzitegi Gorenean Sorturen kontra ipinitako helegiteak erretiratzeko eskatu dio Zapateroren Gobernuari. Bere ustez "argi geratu da ETAren inolako menpekotasunik ez dela nahiz eta batzuek horri ekin". Sortuk emandako pausoarekin ETArekin zerikusirik ez duela erakusten duela gaineratu du Aranak, eta hortaz, Estatuko Abokatutzaren eta Ministeritza Publikoaren helegiteak "erretiratu beharra dagoela" eta hori gertatzen ez bada, "oinarri eta zorroztasun ezagatik" atzera bota beharko dituela Auzitegi Gorenak.