Politika -
Alderdi berriaren aurkezpena
Legebiltzarreko alderdiekin bilera sorta irekiko du lehendakariak
Idoia Mendiak azaldutakoaren arabera, Sortu alderdi berriaren sorreraren ondoren EAEko egoera politikoaren nondik norakoak aztertuko dituzte bileretan.
Erredakzioa
Eusko Legebiltzarreko alderdietako ordezkariekin bilera sorta irekiko du Patxi Lopez lehendakariak, EAEko egoera politikoa aztertzeko helburuarekin. Sortu ezker abertzalearen alderdi politiko berriaren inguruan hitz egingo dute, gaur Idoia Mendia Jaurlaritzako bozeramaileak jakinarazi duenez.
Ezker abertzaleak atzo aurkeztu zituen alderdi berriaren estatutuak. Mendiak azaldutakoaren arabera, Sortu-ren sorreraren ondoren EAEko egoera politikoaren nondik norakoak aztertuko dituzte bileretan. Horrez gain, "terrorismoaren amaiera lortzeko" denek "bide berdina jarraitzea" bilatuko dute.
Lehendakariaren bilera sorta horretan parte hartzeko harremanetan jarri da Jaurlaritza zenbait alderditako ordezkariekin. Solasaldiak lehenbailehen hastea nahi du Patxi Lopez lehendakariak.
Gobernu Bileran zehar, lehendakariak ezker abertzalearen alderdi berriaren sorrera aztertu du. Bere hitzetan, "baikorra" da Sortuk ETAren indarkeria gaitzestea, baina normala da "askok" apustu berri hau "ez sinestea".
Sortu alderdi berriaren ordezkariekin ez du bilerarik egingo lehendakariak.
Bestalde, popularren eta sozialisten arteko hitzarmenak orain arte bezala "indarrean jarraituko" duela nabarmendu du Mendiak. Ezker abertzalearen alderdi berriak akordio horretan "oztoporik" ez duela jarriko uste du Jaurlaritzako bozeramaileak.
