Ehunka pertsona bildu dira Tolosan Txabi Etxebarrieta omentzeko

Ehunka pertsonak bat egin dute Tolosan gaur Txabi Etxebarrieta ETAko kidea omentzeko. Guardia Zibilak hil zuen tiroz orain dela 50 urte, Etxebarrietak Jose Antonio Pardines guardia zibila hil eta gero.

'Etxebarrieta Memoria Elkarteak' antolatu du hitzordua, eta datorren asteburuan Derion eta Bilbon ere ekitaldiak egitea aurreikusi dute. Horrez gain, manifestazioa egingo dutela iragarri dute ekainaren 7an Bilbon.

Tolosako ekitaldian lore-eskaintza egin dute Etxebarrieta hil zuten tokian, Benta Haundin. Haren aurpegia duen irudi batez gain, xingola beltza duen ikurrin bat ipini dute. Ondoren, omenaldia egin diote herriko erdigunean.

Besteak beste, Aitziber Ibaibarriaga Bilboko Udaleko EH Bilduko zinegotziak hartu du parte, omenduaren ilobak. Itziar Aizpurua ezker abertzaleko militante historikoa ere han izan da.

AVT

Terrorismoaren Biktimen AVT elkarteko zenbait ordezkari egon dira, 'Egia, memoria, duintasuna eta justizia' (Verdad, memoria, dignidad y justicia) zioen pankarta batekin.