Estatuak Katalunian hartutako neurriekin 'abixua' eman nahi izan duela esan du EAJk

Joseba Egibar Eusko Legebiltzarrean EAJren bozeramaileak adierazi duenez, Espainiako Gobernuak "politikari belaunaldi oso bat gaitasungabetu nahi du, eta gainerakoei lezioa eman".

Radio Euskadin izandako tertulia politikoan Egibarrek esan duenez, Kataluniako prozesu independentistarekin lotutako bost buruzagi espetxeratu izanak "baieztatzen du Estatu autoritario eta mendekari baten bide-orria, ezin baitu Katalunian aritu bide demokratikoei eutsita, eta beste batzuk erabili ditu: Justizia auzitegiarenak, hain zuzen ere". Buruzagi jeltzaleak azpimarratu duenez, 155. artikuluaren aplikazioarekin "ez dago aurrekontu negoziaziorik".

Bestalde, Iker Casanova EH Bilduren legebiltzarkideak esan du "Estatuan geratzea aukerarik onena dela gure buruan sartzeari uko egin dio Espainiako Estatuak, eta orain indarkeriazko parte-hartzea inposatzeari ekin dio".

"Horrek autoafirmazio joera eragiten du Katalunian eta Euskadin ere", gaineratu du. EAJri ere kritika egin dio, esanez "gainerakoei salaketak egitean aditua da, baina PPko Gobernua babestu zuen 2017ko aurrekontuak onartzerakoan".

 

 

Iñigo Martinez Elkarrekin Podemoseko legebiltzarkideak, berriz, adierazi du buruzagi katalanen espetxeratzea "autoritarioa eta gehiegizkoa" dela, eta horrek "herritar independentista gehiago eragiten" dituela.

Kataluniako prozesuarekiko "oso jarrera kritikoa" plazaratu du, identitate nazionalaz haratago, "Kataluniako agintariak politikari independentistak zirelako, eskuinekoak, politika neoliberalak ezartzen zituztenak".

Jose Antonio Pastor PSE/EEko ordezkariak esan du "155. artikulua ezarri aurretiko murrizketa guztien laborategia" zela Katalunia, eta "Kataluniako burgesiak zuzendu" duela prozesu independentista. Dena dela, onartu du atzo "egun tristea" izan zela, eta buruazagi katalanak kartzelatzeak "arazoa okerragotzen" duela.

Amaitzeko, Nerea Llanosek, PPko ordezkariak, azpimarratu du epailearen erabakia ez dela atsegina, baina dio atxilotuek "bazekitela legea urratzen ari zirela". "Demokrazia gabezia litzateke guztiei era berean legea ez aplikatzea", amaitu du.