Politika -
Martxoak 8
23 hutsunerekin egin du bilkura Eusko Legebiltzarrak
EH Bilduko, Elkarrekin Podemoseko eta PSE-EEko legebiltzarkideek alde egin dute, eserlekuak hutsik utzita, sindikatuek eta mugimendu feministek deitutako grebarekin bat egiteko.
agentziak | erredakzioa
Martxoak 8ko greba feminista Eusko Legebiltzarrean ere ikusi izan da, EH Bilduko, Elkarrekin Podemoseko eta PSE-EEko legebiltzarkide emakumezkoek alde egin baitute, eserlekuan hutsunea utzita.
EAJren eta PPren ordezkariek baino ez dute erabaki osoko bilkuran parte hartzea, Barkartxo Tejeria (EAJ) presidente buru dela. Oraingo legealdian, emakumezkoak (40) gizonezkoak (35) baino gehiago dira.
EH Bilduko 12 ordezkariek, Elkarrekin Podemosen bostek eta PSE-EEren seiek bat egin dute sindikatuek eta mugimendu feministak deitutako grebarekin.
EAJren kasuan, jeltzaleen 28 ordezkariek 15 minutuko elkarretaratzea egin dute eguerdian, alderdiak egindako deialdietan parte hartzeko.
Elkarretaratzea, Legebiltzarraren kanpoaldean. Argazkia: EFE
PPko ordezkariek ere bilkura egin dute, Emakumeen Eguna dela eta, eta Legebiltzarrak ekitaldi ofiziala deitu ez duela kritikatzeko.
Gainera, PPko legebiltzarkideen kasuan, emakumezkoek soilik parte hartu dute eztabaidetan.
Elkarretaratzea Nafarroako Parlamentuaren aurrean
50 lagun inguru bildu dira gaur Nafarroako Parlamentuaren aurrean Emakumeen Nazioarteko Eguna aldarrikatzeko; ekimenean, Gobernuko eta Parlamentuko presidenteak izan dira buru.
Ainhoa Aznarez Parlamentuko presidenteak elkarretaratzearen amaieran hedabideei adierazi dienez, emakumeok "oraindik desberdintasun" egoerak bizi behar dute egunero.
Hori dela eta, antolatutako elkarretaratzeetan parte hartzera gonbidatu die herritarrei, "emakumeok planto egiten dugula" adierazteko; izan ere, gaurkoa "greba historikoa" da, eta "berdintasuna, begirunea eta askatasuna" aldarrikatzen jarraitzeko greba da.
