Roger Torrent proposatu du ERCk Parlamentuko presidentea izateko

ERCk Roger Torrent proposatu du Kataluniako Parlamentuaren presidentea izateko, aurreko legealdian Junts pel Siko bozeramailearen ondokoa izan zena. Asteazken honetan egingo dute Ganbera osatzeko saioa.

ERCren batzorde iraunkorrak eta talde parlamentario berriak astearte arratsaldean berretsi dute Roger Torrenten hautagaitza. Roger Torrent (Sarria de Ter, Girona, 1979) Politika Zientzietan lizentziatu zen Bartzelonako Unibertsitate Autonomoan, lurralde eta hirigintza masterra du, bere herriko alkatea da 2007tik, eta baita diputatua ere, 2012tik.

“Ganberako gehiengoaren konfiantza baldin badut, Carme Forcadell karguan ordezkatzea ohore bat izango da; Forcadellek inork ez bezala defendatu du erakundea, eta lan egingo dut maila emateko”, adierazi du Torrentek ERCren agiri batean. Lehen helburua “erakundea herritarren zerbitzura berriro jartzea” izango duela azaldu du, “eta ez 155. artikuluko alderdien zerbitzura”. “Abenduaren 21eko hauteskundeetako agindu demokratikoa beteko dut”, gaineratu du.

 

Iragan astean Forcadellek berriro presidente izateko aukerari uko egin ondoren, Torrentek laudatu egin zuen Twitter sare sozialean: “Ausardia, kemena, irmotasuna eta, batez ere, erakundea eta parlamentarismoa defendatzeko sena. Eztabaida eta hitza babestu. Mila esker, Carmen Forcadell, zure lanagatik. Zure laguntza izango dugu Parlamentuan”.

 

Historiako presidenterik gazteena

Parlamentuan inoiz izan den presidenterik gazteena izango da Torrent. Bestalde, Alba Verges proposatu du ERCk Mahai berriko idazkari izateko. ERCren proposamena gainerako alderdiei helarazi diete dagoeneko.

Parlamentua osatzeko saioa asteazken honetan egingo dute. Independentisten gehiengo absolutua (70 diputatu) murritzagoa izango da agian; izan ere, hiru hautetsi (Oriol Junqueras, Jordi Sanchez eta Joaquim Forn) espetxean daude eta beste bost (Carles Puigdemont, Clara Ponsati, Lluis Puig, Antoni Comin eta Meritxell Serret) Belgikan. Horiek guztiek botoa beste diputatu baten esku uzteko aukerarik ez badute, independentistek 62 ordezkari izango dituzte Ganberan.

Botoa eskuordetzea

Adineko Mahaiak erabaki beharko du botoa eskuordetzeko eskaerak onartu ala ez. Junts per Catek eta Esquerrak eskaria egingo dute, seguruenik, kartzelan edo Belgikan dauden zortzi diputatu hautetsiak botorik eman gabe ez geratzeko. ERCko hiru diputatuk osatuko dute Adineko Mahaia: beteranoena, Ernest Maragall, eta bi gazteenak, Gerard Gomez del Moral eta Rut Ribas.

Nahiz eta zortzi diputatu hautetsi horiek botoa beste baten esku uzteko aukerarik ez izan, independentistek ez dute Parlamentuko Presidentetza arriskuan ikusiko, Podemek beste hautagai bat aurkeztu eta alderdi unionista guztiek babesten ez badute behintzat.