Politika -
Kataluniako hauteskundeak
CUPek 'gehiengo errepublikanoa' ospatu du eta lau aulkiak 'giltzarritzat' jo ditu
Lau helburutatik bi bete dituzte hauteskundetan: Errepublikaren aldekoek gehiengoa eskuratzea eta bloke horretan ezkertiarrek (ERC eta CUP) Junts per Catalunyak baino eserleku gehiago izatea.
Agentziak | Erredakzioa
Carles Riera CUPeko zerrendaburua pozik agertu da bloke independentista gailendu delako hauteskundeetan, bere alderdiak 10 eserlekutatik sei galdu dituen arren. Aulki horiek "giltzarri" izango direla nabarmendu du, eta gaurkoan "Errepublikak irabazi du", adierazi du.
Bartzelonako Nau Bostik gunean egindako agerraldian, Rierak erantsi du CUPek lau helburutatik bi bete dituela hauteskundeetan: Errepublikaren aldekoek gehiengoa eskuratzea eta bloke horretan ezkertiarrek (ERC eta CUP) Junts per Catalunyak baino eserleku gehiago izatea. Hala ere, onartu du ez dutela lortu emaitza ona eskuratzea eta Parlamentuan ezkerreko gehiengoa nagusi izatea.
Hautagaiaren esanetan, lorturiko emaitza oso urrun dago espero zituzten eta jarri zituzten helburuekin. Rierak uste du aurreko hauteskundeetan CUPen aldeko botoa eman zutenetako askok ERC eta JxCat bozkatzea erabaki dutela. Hala eta guztiz ere, lorturiko lau eserlekuak gehiengo errepublikarra osatzeko "giltza" izango direla esan du.
CUPek lau aulki eskuratu ditu, hau da, 2015eko hauteskundeetan lortutakoaren erdia (hamar eskuratu zituzten, botoen % 8,21ekin) baino gutxiago, eta Parlamentuan sartu zenean bezala geratu da ia, hiru ordezkari lortuta orduan.
Riera pozik azaldu da "karta guztiak jokatu eta irabazi ezin izan duen Espainiako Estatuaren aurrean". Halaber, esan du hauteskundeotan Ciudadanos "Estatuko erregimena zela eta dela, 78ko erregimenarena, PP sakrifikatzeko prest egon da 155.aren botoa Ciudadanosen sartzeko". Emaitza garrantzitsua lortu duela adierazi du, baina alderdi konstituzionalistek ez dutela gehiengoa osatzen azpimarratu du.
"155aren Estatu kolpea garaitua" izan dela esan ostean, ostiraletik aurrera Kataluniako errepublika eraikitzen hasteko deia egin du, duintasunaren dekretua eta prozesu konstituziogilea abiapuntu hartuta. Halaber, Kataluniako errepublika eraikitzeko modu bakarra aldebakartasuna dela aurpegiratu die JxCat eta ERCri, Estatu espainiarrarekin elkarrizketak abiatzea ezinezkoa dela iritzita.
