Astebete atzeratu dute Kataluniako Parlamentuko Mahaiko kideen deklarazioa

Pablo Llarena Auzitegi Goreneko epaileak astebete atzeratu du, azaroaren 9ra, Katataluniako Parlamentuko presidentearen eta Mahaiko beste bost kideen deklarazioa, epaitegietatik adierazi dutenez.

Llarenak kontuan hartu ditu Mahaia osatzen duten kideen abokatuek aurkeztutako eskaera, eta bertan behera utzi ditu gaur eta bihar egin behar ziren deklarazioak, matxinada, sedizioa eta dirua bidegabe erabiltzea leporatuta hastekoa zen epaiketaren baitan.

Horren aurrean, Ministerio Publikoa ez da aurka agertu, eta epailearen esku utzi du erabat erabakia.

Forcadell pozik dago "etxera bueltatzeagatik"

Forcadell pozik dago Ganbarako mahaikideak "etxera bueltatzen" direlako;  eta, halaber,  ostegun honetan Auzitegi Nazionalean deklaratu behar duten Gobernuko kontseilari ohiei "babesa" eskaini die.

"Etxera goaz. Eskerrik asko guztioi zuon lana, babesa eta ahaleginengatik. Babes osoa, gaur Auzitegi Nazionalean deklaratu behar duten kontseilariei", esan du Forcadellek Twitter bidez.

 

 

Gobernuko kide ohiak eta Parlamentuko sei mahaikideak Auzitegi Nazionalean eta Auzitegi Gorenean, hurrenez hurren, deklaratzera deituak zeuden gaur, baina Carles Puigdemont presidente ohia eta bere Gobernuko lau kontseilari Espainiatik kanpo daude eta ez dira epaitegira deklaratzera joango.

Forcadell, kontrolatuta

Azaroaren 9ra arte Carme Forcadell eta gainerako bost kideak Poliziaren zaintzapean jartzea eskatu du Fiskaltza Nagusiak, iturri judizialek Europa Pressi adierazi diotenez.

Auzitegi Gorenak Mahaiko presidente eta beste bost kideren deklarazioa ebatzi ostean egin du eskaera Fiskaltzak.

Zainketa ez da aurrez aurre egingo, baizik eta etxean dagoela konprobatuta, eta telefono mugikor baten bidez, Poliziak kontrolak egiteko aukera izateko, Javier Melero Lluis Coromoinas eta Lluis Guinoren abokatuak azaldu duenez.