155ari buruzko plenoa, ostegunean 10etatik aurrera Kataluniako Parlamentuan

Kataluniako Parlamentuak osoko bilkura monografikoa deitu du ostegunerako, Espainiako Konstituzioaren 155. artikulua aplikatzeko erabakiari erantzuteko. Zehatz-mehatz esanda, 155. artikuluaren aplikazioaren balizko ondorioak aztertuko dituzte 10:00etan hasiko den plenoan.

Parlamentuak ohar bidez jakinarazi duenez, 10:00etan egingo da eztabaida orokorra. Dena den, ez du zehaztu talde politikoek aurkeztuko dituzten ebazpenen eztabaida noiz egingo den.

Kataluniako Parlamentuko iturriek Europa Press albiste agentziari azaldu diotenez, oraindik ez dute osoko bilkuraren gidoia (ordutegia) zehaztu. Carles Puigdemont Kataluniako presidenteak ez du baieztatu oraindik Senatuan izango den eta, hori gertatuko balitz, bere agerraldia ostegun arratsaldean edota ostiral goizean egingo lukeen.

Gau-gaurkoz argi dagoena da Kataluniako Parlamentuko osoko bilkura ostegunerako, 10:00etan, deitu duela Carme Forcadell Parlamentuko presidenteak. Hala ere, oraingoz ez da argitu ebazpenen bozketa ostegunean edota ostiralean izango den.

Bozeramaileen Batzordeak astelehenean erabaki zuenez, eztabaida amaitzean talde bakoitzak hiru ebazpen aurkeztu ahal izango dituela. Ikusteko dago ea independentziarekin erlazionatutako testuren bat aurkezteko erabiliko duten JxSik eta CUPek.