PP Gobernutik kentzeko akordioa proposatu dio Iglesiasek PSOEri

2015eko abenduaren 20ko hauteskunde orokorren ondoren "akatsak" egin zituela onartu du Pablo Iglesias Podemoseko idazkari nagusi eta Unidos Podemoseko diputatuak eta, hori dela eta, eskua luzatu dio PSOEri PP Gobernutik kentzeko. Dena den, Ciudadanos (C's) balizko akordio horretatik kanpo uzteko eskatu die sozialistei.

"Nahiago nuke berandu baino lehen PP Gobernutik ateratzeko ados jarriko bagina", adierazi du Podemoseko buruzagiak bere taldeak Mariano Rajoyren kontra aurkeztu duen zentsura-mozioaren hitzaldiaren baitan.

Iraganean izandako desadostasunak albo batera utzi eta PSOErekin hitz egiteko eta akordioak lortzeko prest agertu da Iglesias, batez ere, haren esanetan, Alderdi Sozialistako oinarriek "establishment" deitutakoari emandako "lezioaren" ondotik. Izan ere, zuzendaritzak Pedro Sanchez kargutik kendu ostean oinarriek bera aukeratu dute idazkari nagusi izateko.

Esperantzak beldurra garaituko duen itxaropenarekin eta Podemosen ohiko mezuarekin amaitu du hitzaldia: "Sí se puede".

Espainiak ez duela Iglesias presidente izatea merezi ziurtatu du Rajoyk

Mariano Rajoy Espainiako Gobernuko presidenteak Unidos Podemoseko diputatuari erantzunez adierazi duenez, Pablo Iglesiasek ez du gobernuburu izatea merezi, ezta Espainiak "zigor" hori ere. Erasora jotzeko presa izatea leporatu dio Iglesiasi, beste alderdi batzuk (PSOEri aipamena eginez) errekuperatzen ari direla ikusita.

Bestalde, "ikuskizunaren, keinuen eta esloganen" politika kritikatu ditu eta Parlamentua telebistako platoa dela uste izatea egotzi dio Podemosi. "Parlamentua tertulia bat baino gehiago da, ordea", azaldu du Rajoyk. Haren esanetan, Iglesiasen "harrotasunak" presidente izateko gaitasunik gabe uzten dio.

Barkamena eskatu eta 'lapurtutakoa' itzultzeko galdegin dio Monterok PPri

Irene Montero Unidos Podemosek Espainiako Diputatuen Kongresuan duen bozeramaileak defendatu du bere taldeak Mariano Rajoyren kontra aurkeztutako zentsura-mozioa, eta bi ordutik gora iraun duen hitzaldian, kritika gogorrak egin dizkio PPri, ustelkeria ardatz hartuta.

Hitzaldiaren une askotan, tonua igo du Irene Monterok eta era guztietako iruzkinak eta kritikak egin dizkiote sare sozialetan. Alderdi Popularrak, esaterako, Monteroren mintzaldiari ironiaz egin dio aipamena sare sozialetan.

 

 

Hitzaldian, "barkamena" eskatzeko eta "lapurtutako dirua" itzultzeko eskatu dio PPri, Mariano Rajoy nahastuta dagoen dozenaka ustelkeria kasuen harira. Monterok banan-banan aipatu ditu, haren esanetan, PP nahastuta dagoen 67 ustelkeria kasuak, Naseiro kasuarekin hasi eta Barcenas, Punica edo Lezo gogoratuz amaitzeko. "Ustelkeriak badu bere egoitza, zehazki, Genova 13", aurpegiratu dio Monterok Rajoyri Alderdi Popularraren egoitza nagusiari aipamena eginez.

Halaber, hainbat ministroren dimisioa eskatu du: Rafael Catala Justizia ministroarena, Fiskaltzaren ustezko erabileragatik; Cristobal Montoro Ogasun eta Administrazio Publikoko ministroarena, amnistia fiskalagatik; Jose Ignacio Zoido Barne ministroarena, "Estatuko estoldengatik"; eta, azkenik, Maria Dolores de Cospedal Defentsa ministroarena.

Irene Montero Diputatuen Kongresuan egin duen hitzaldian. Argazkia: EFE

Ustelkeria kasu bat aipatu duen bakoitzean, "ordenaren, seriotasunaren eta zentzuaren" alderdi gisa definitu arren, praktikak kontrakoa erakusten duela aurpegiratu dio, adibideak jarriz.

"Lotsagarria!", esan du behin eta berriz, hain zuzen ere, ustelkeria kasu bati buruzko xehetasunak ematen zituen bakoitzean.

"Espainia nazka-nazka eginda dago", eta "nahikoa da, zuen garaia amaitu da", esan dio Monterok Rajoyri. Gainera, "beste alde batera begiratzeagatik" begiak nekatuta izatea leporatu dio. Hori guztia dela eta, Gobernua utzi behar dutela esan die. Ildo horretan, "kanporatu egin behar ditugu" izan da bere hitzaldian gehien errepikatu duen beste esaldietako bat.

Ustelkeriaz harago, sektore guztietan murrizketak egitea egotzi dio PPren Gobernuari: osasuna, hezkuntza, pentsioak, etxebizitza, indarkeria matxistaren kontrako borroka... Bestalde, "autoritarismoa", "matxismoa" eta "hala moduzko elitismoa" ere leporatu dizkio.

Monteroren akusazioak ukatu ditu eta Unidos Podemosen kontra egin du

Mariano Rajoy, Irene Monterori erantzunez. Argazkia: EFE

Mariano Rajoy Espainiako Gobernuko presidentearen esanetan, Unidos Podemosek bere aurka aurkeztu duen zentsura-mozioa "parodia" edota "fartsa" bat da, eta Irene Monterok Espainiako Gobernuaren eta PPren aurka esandakoak ukatu ditu. Esate baterako, Rajoyk ukatu egin du berak edo Gobernuko kideek legea urratu izana.

Bestalde, herritarrek ez dutela mundua Podemosek bezala ikusten erantzun dio.

Rajoyk behin baino gehiagotan aipatu ditu Irene Monterok bere hitzaldia egiteko erabilitako modua eta sakoneko mezua. "Zerua lortu nahi bazenuen, atez nahastu zara", adierazi dio Rajoyk Pablo Iglesiasi.

Ustelkeriaren gaiari helduta Rajoyk azpimarratu duenez, Podemosen akusazioak "faltsuak" dira, eta ohartarazi du ustelkeria ez dela amaituko ez zentsura-mozioak aurkeztuz ezta PPren kontrako harriak jaurtiz ere.

Bestalde, zentsura-mozioarean "erabilera kapritxosoa" egitea leporatu dio Unidos Podemosi, eta ekimen parlamentario hori degradatzea eta gizartea asaldatzeko erabiltzea.

EAJk edukirik gabekotzat jo du

Aitor Esteban EAJren diputatuak esan du zentsura mozioak ez duela "inolako konfiantzarik" ematen, baina, gainera, "jarrera berarekin jarraituz gero" bere hautagaitza ez dela "alternatiba" eta "ez dela izango" esan du.

Estebanek Kongresuan egindako agerraldian azaldu duenez, Podemosek ez du benetako asmorik Gobernua osatzeko gehiengoa bilatzeko, eta akordioa egiteko borondate eza gaitzetsi du.

"Ezinezkoa da horren gutxi landutako proposamena aurrera ateratzea", azpimarratu du.

Estebanek keinuetan oinarritutako politika izan du hizpide, eta aitortu du une batzuetan balioa izan dezakeela, baina "keinu hutsen politikak ezer ere ez" duela lortzen gaineratu du.

Era berean, Podemoseko euskal ordezkariek Kongresuan ahotsik ez izatea leporatu dio: "Kataluniarrek eta galiziarrek ahots propioa dute; euskal ordezkariek, bat ere ez". "Ez dakit uzten ez dieten edo gustura dauden egungo egoerarekin", adierazi du.

EH Bilduk Kataluniako erreferenduma babesteko eskatu dio

Marian Beitialarrangoitia EH Bilduren diputatuak zentsura mozioa babestu du, Mariano Rajoy kargutik kentzea "premiazkoa eta beharrezkoa" delako, baina Kataluniako erreferenduma babesteko eskatu dio, Estatuak orain arte uko egin baitio.

Beitialarrangoitiak esan du EH Bilduren bi diputatuek "baiezko kritikoa" emango diotela zentsura mozioari, "PP kentzea lehentasunezkoa" delako, "Europako alderdi ustelena" den heinean.

Hala eta guztiz ere, euskal diputatuak zehaztasun gehiago eskatu dio Iglesiasi, azal dezala zer egingo duen "Estatua demokratizatzeko" eta "nazioaniztasuna eta erabakitzeko eskubidea" egin bihur daitezen.

"Kataluniako agintariei babesa ematea da demokratizazioaren alde egiteko modu onena. Itundutako erreferenduma badago, ederki, baina, bestela, zerbait egin behar da erabakitzeko eskubidea defendatzen dutenek eskubidea egikaritzeko", gaineratu du Beitialarrangoitiak.