Urkullu: 'Autogobernua eguneratzeko inoiz izan ez dugun aukera dugu'

Eusko Legebiltzarrean Autogobernua Eguneratzeko Ponentzia abian, "inoiz eduki ez dugun aukeraz baliatzea"ren alde mintzatu da gaur Iñigo Urkullu lehendakaria. Ganberan ordezkaritza duten bost alderdien parte hartzearekin ostiral honetan ekin dio lanari ponentziak, eta "une historiko" horren garrantzia azpimarratu du Urkulluk.

"Errepasatu gure historiaren azken mendea, eta konturatuko zara inoiz ez dugula izan halako aukerarik", nabarmendu du Maddalen Iriarte EH Bilduko legebiltzarkideak egindako galderari erantzunez.

Kritiko agertu da lehendakaria EH Bilduren jarrerarekiko. Salatu duenez, koalizioa eztabaida aurrena Euskadin, Legebiltzarrean, egitea saihesteko asmotan dabil beti: "Ematen du ganbera honetan ados jartzeko konpromisoari izkin egiten diola —EH Bilduk— , horrek amore ematea, akordioa bilatzea eta hura betetzea dakarrelako, akaso".

Urkulluren ustez, "Madrilek egin dezakeenaz hitz egin baino lehen, Gasteizen hitz egin behar dugu". Hala, bost alderdien parte hartzearekin autogobernua eguneratzeko eta sakontzeko adostasuna lortzeko deia egin du, eta EH Bilduri ohartarazpena egin dio. "Hamabostean behin autogobernuarekin lotutako galderak eginda estutasunean jartzen banauzue, nire erantzuna beti bera izango da: ponentziara bidaltzea".

"Aurrebaldintzarik ez dut jarriko", erantsi du lehendakariak, "une historikoaren" garrantzia beste behin azpimarratu ondoren.

Iriarte: "Ezin zaie herritarrei bizkar eman"

Lehendakariak Espainiako Gobernuarekin aldebiko akordioa bilatu nahi izatea deitoratu du Maddalen Iriarte EH Bilduko legebiltzarkideak, "errealitateak erakutsi baitigu bide hori ez dela existitzen", iritzi dio.

Iriarteren hitzetan, "ezin zaie herritarrei bizkar eman", eta erabakitzeko eskubidea aldeko ituna lortzeko lan egingo duela iragarri du.