PSOEk Patxi Lopez proposatuko du berriro Kongresuko presidente izateko

Pedro Sanchez PSOEko idazkari nagusiak Patxi Lopezek Kongresuko presidente gisa egindako lana goraipatu du, eta gaur XII. Legegintzaldiaren lehenengo saioan berriz presidente hautatzea espero du.

"Horren zatituta dagoen egoera honetan, talde guztiek aitortu dute bere lan ona, bere historia politiko guztian beti lehenetsi dituelako elkarrizketa, negoziazioa eta akordioa", azpimarratu du sozialisten bileran.

PSOEren Batzorde Exekutibo Federalak erabaki du Patxi Lopezen hautagaitza aurkeztea berriro Kongresuko presidente izateko. Mahairako, Micaela Navarro orain arte presidenteorde izan dena aurkeztuko du PSOEk.

Lopezekin batera, En Comu Podemek Xavier Domenech bozeramailea aurkeztuko duela iragarri zuen herenegun Podemosek.

Patxi Lopez Kongresuko presidente izan zen aurreko legegintzaldian, inoizkorik laburrenean, PSOEk Ciudadanosekin lortutako akordioari esker. PPk boto zuria eman zuen, eta ez zuen PPko hautagairik aurkeztu postu horretarako.