Politika -
Auzitegi Nazionala
Urte eta erdiko zigorra Eroritakoen Harana bonbardatzea eskatzeagatik
Txomin Mirena Gil Ferrero eta Erlantz Lopez de Ocariz zigortu dituzte, Facebook eta Twitter sare sozialetan terrorismoa goratzeagatik.
Agentziak | Erredakzioa
Facebook sare sozialean ETAko kideak goratu zituen bilbotar bati urte eta erdiko espetxe-zigorra ezarri dio Auzitegi Nazionalak. Eroritakoen Harana “defendatzen duten guztiak barruan daudela” bonbardatzeko nahia agertu zuen. Fiskalak bi urteko espetxe-zigorra eta kargu publikoan aritzeko 8 urteko debekua eskatu zuen. Akusatuak zigorra adostu eta onartu du.
Txomin Mirena Gil Ferrerok (52 urte) Facebooken kontu bat kudeatzen zuen 2011tik, eta 415 jarraitzaile zituen. Fiskalaren arabera, kontua “asko erabiltzen zuen”, eta ETA, erakundeko armatuko kideak, Askatasuna edo Herrira “laudatzeko edukiak” argitaratu zituen.
Besteak beste, Josu Uribetxeberria Bolinaga ETAko kidearen irudi bat partekatu zuen, presoari baldintzapeko askatasuna eman ziotenean: “Ongi etorri, Josu! Guztiak kalean izan arte ukuilua astindu behar dugu…”.
Bestalde, Luis Carrero Blanco almirantearen argazki bat argitaratu zuen, haren heriotzaren urteurrenean: “Espainiako Agentzia Aeroespazialaren lehen hegaldiak 39 urte bete ditu gaur, Luis Carrero Blanco almirantea buru zuen espedizioak”.
Azken argitalpenen artean, Eroritakoen Haranaren irudi bat nabarmendu du fiskalak: “Nik ere Eroritakoan Harana bonbardatu nahi dut (defendatzen duten guztiak barruan daudela)”.
Erlantz Lopez de Ocariz
Era berean, Erlantz Lopez de Ocariz zigortu du Auzitegi Nazionalak, Twitter eta Facebook sare sozialetan terrorismoa goratzeagatik. Fiskalak urtebete eta zortzi hilabeteko kartzela-zigorra eta kargu publikoan aritzeko 8 urteko debekua eskatu zuen. Honek ere zigorra onartzea erabaki du.
Sare sozialetan egindako adierazpenen artean, fiskalak 2011ko bat azpimarratu du: “Idealei, askatasunari ez zaio uko egiten, azken gizonera arte borroka egiten da, azken umea bere aitaren esku hotzen artean arma bat hartzeko kapaz den arte”.
Bestalde, Ines del Rio ETAko kidearen irudi bat partekatu zuen 2013an, Estrasburgoko Giza Eskubideen Auzitegiak ‘Parot doktrina’ baliorik gabe utzi eta Del Rio espetxetik atera zenean.
