Goierriko 300 hautetsik erabakitzeko eskubidea babestu dute, Araman

Gure Esku Dagok Goierriko 300 alkate eta zinegotzi baino gehiago (egungoak zein 1979tik hona Goierriko udaletan hautetsi izandakoak) batu ditu Araman erabakitzeko eskubidearen alde, duela 85 urte egin zutena gogora ekartzeko. Izan ere, 85 urte bete dira eskualdeko udaletan erabakitze eskubidearen aldeko lehen manifestuak sinatu zituztela.

Gaur konpromiso hura berretsi nahi izan dute, berriz ere autodeterminazioaren aldeko agiri bat sinatuz. Agirian, besteak beste, honako hau irakur daiteke:

"Araman orain 85 urte bertako ordezkari politikoek egin zuten moduan, 2016. urteko apirilaren 16an Goierriko ordezkariak garen heinean, gogora ekarri nahi ditugu orain 85 urte Goierriko ordezkari politikoek sinatutako aktak". Horrez gain, ekainean hainbat udalerritan egingo diren herri galdeketetan parte hartzeko deia egin diete herritarrei.

Aramako alkate den Asier Mujikak irakurri du testua, bere aitona Joaquin Mujikak (orduko alkateak) 85 urte lehenago egin zuen bezala.