Matasek 3 milioi euroko bermea ordaindu du kartzela saihesteko

Jaume Matas Balearretako Governeko presidente ohiak hiru milioi euroko bermea ordaindu du kartzelan sartzea saihesteko. Jose Castro epaileak ezarri zion bermea behin behinaen kartzelan sartzeko aukera saihesteko. Palma Arena kiroldegiaren eraikuntzan ustelkeriaz jokatu ote zuen ikertzen ari dira.

Balearretako Auzitegi Nagusiaren arabera, Matasek atzo sartu zuen bermea horretarako bereziki prestatutako Banestoren kontuan.

Bermea ordainduta, Balearretako politikari ohiak behin behineko askatasuna eskuratu du, baina pasaportea kendu diote, Espainiako Estatutik ateratzea debekatu diote eta epaitegira joan behar du hilero, 1ean eta 15ean.

Balearretako Governeko presidente ohi eta Ingurugiro ministro ohiak gaurko gauerdira arte zuen bermea ordaintzeko epea, Jose Castro Palma Arena auzia daraman epaileak 72 ordu eman zizkion behin behinean aske jarraitzeko aukera izan zezan.

Egunotan, Rafael Perera Matasen abokatuak berretsi du bere bezeroak epea agortuko zuela bermea ordaintzeko.

Martxoaren 30etik, Balearretako presidente ohiak hiru milioi euroak biltzeko kudeaketak egin ditu.

Elkarrizketa Balearretako presidente ohiarekin

"Deliturik egin ez dudala badakit", adierazi du Balearretako presidente ohiak elkarrizketa batean. ''Palma Arena auzian'' errugabea dela defendatu du Matasek eta "lur jota utzi" dutela salatu du, "ezer ere egin gabe".

"Kalte handia egin didate, nirekin harremana duten pertsona guztiak eta senitartekoak lur jota daude. Etorkizuna hondatu didate, orain berreraiki beharko dut eta horretarako mesedeak eskatu behar izan ditut…eta guztia ezer ere egin gabe", esan du balearretako politikari ohiak.