Gure Esku Dagok 'ekitaldi erraldoia' iragarri du ekainerako Bilbon

Gure Esku Dago erabakitzeko eskubidearen aldeko dinamikak "ekitaldi erraldoia" iragarri du ekainerako Bilboko itsasadarrean. Dinamikaren helburua Bilbo "erabakitzeko aroaren erdigune" bihurtzea da.

Alex Zenarruzabeitia Gure Esku Dago dinamikaren Bizkaiko arduradunak eta Nerea Epelde Deustuko ordezkariak prentsaurrekoa eskaini dute Bilbon, ekainerako antolatuko duten ekitaldiaren berri emateko eta ikasturte honetarako ezarri dituzten erronkak azaltzeko.

"Erabakiaren aroa" hasi dela azpimarratu ondoren, Bilbo Handia "erabakiaren hiriburua" izango dela adierazi dute. Gure Esku Dago ekimenaren esanetan, Euskal Herriak "erabakitzeko eskubidea dauka eta herritarren garaia da". "Gure Esku Dago dinamikak herri honetan bizi diren 3.000.000 herritarrak integratu nahi ditu. Euskal Herri osoko biztanleen herena Bilbo Handian bizi dela kontuan hartuta, erabakitzeko aroan rol garrantzitsua izan behar duela jakitun gara", nabarmendu dute.

"Gure hiriburuan erabakitzeko eskubidea gauzatzea ahalbideratuko duten akordioak lortzeko lan egingo dugu", gaineratu du. Horretarako, erabakitzeko eskubidearen aldeko adostasunak eta elkarguneak jasoko dituzten adierazpenak landuko dituzte auzoetan.

"Gure erronka ahalik eta atxikimendu gehien lortzea izango da eta, gero, Bilboko itsasadarraren bueltan egingo den ekitaldi erraldoia egitea", azaldu dute. Gure Esku Dagok azaldu duenez, zubiak dira Bilboko itsasadarra erakusten duten postal guztietako protagonistak. Ildo horretan, nabarmendu dute zubiak eraikiko dituztela hiritarren eta borondateen elkargunearen artean eta hori erabakiaren itsasadarrera eramango dutela.