Politika -
ETAren hilketa Frantzian
Zapatero: "Frantziak garesti ordaindu du ETAren aurkako laguntza"
Espainiako Gobernuko presidenteak ohartarazi du bi herrialdeek jarraitu egingo dutela "gaizkileen aurkako borroka gupidagabearekin".
Erredakzioa
Jose Luis Rodriguez Zapatero Espainiako Gobernuko presidenteak adierazi du Frantziak "garesti" ordaindu duela ETAren aurkako borrokan eman duen laguntza, baina bi herrialdeek "gaizkileen aurkako borroka gupidagabearekin" jarraituko dutela ohartarazi du.
Kongresuan kazetarien aurrean egindako adierazpenetan, Espainiako gobernuburuak dolumina adierazi die bart Paristik gertu ETAk hildako poliziaren senideei, Frantziako Segurtasun Indarrei eta Nicolas Sarkozy presidenteari.
"Gure Segurtasun Indarretako kidea bailitzan sentitu dut jendarme honen hilketa, ETAren amaieraren eta askatasunaren xedeak guk bezala sentitzen baitute [Frantziako poliziek]", gaineratu du.
Hilketa "irmo" gaitzetsi eta gero, Zapaterok gogorarazi du erakundea "zorrotz jazartzen" ari direla azken aldian Poliziaren eraginkortasunaren ondorioz, baina ETAk oraindik "asmo kriminalak" dituela gainreatu du.
Halaber, goizean Sarkozyrekin hitz egitea espero duela zehaztu du.