PSOEk Patxi Lopez proposatuko du Kongresuko presidente kargurako

PSOEk Patxi Lopez lehendakaria proposatuko du Espainiako Diputatuen Kongresuko presidentetzarako, iturri sozialistek EFE albiste agentziari baieztatu diotenez. Espainiako Diputatuen Kongresua osatzeko osoko bilkura egingo da asteazkenean.

Lopezen izena bolo-bolo zebilen azken egunetan eta gaur haren izena proposatuko duela baieztatu du Espainiako Alderdi Sozialistak. Dena den, PSOEko zuzendaritza federalak eta Espainiako Diputatuen Kongresuko talde parlamentarioak berretsi beharko dute Lopezen hautagaitza, hurrenez hurren, bihar eta asteartean egingo dituzten bileratan.

Pedro Sanchezek gidatutako zuzendaritza federalean sartu zenetik, PSOEko idazkari nagusiaren konfiantzazko gizona bihurtu da Patxi Lopez. Are gehiago, abenduaren 20ko hauteskunde orokorretako emaitzen eta alderdi barruko eztabaiden ondotik babesa eskaini dio Sanchezi.

Espainiako Diputatuen Kongresuko presidente izateko alderdiek mahai gainean jarri duten lehendabiziko izena da Lopezena. Alderdi Popularrak Jesus Posada Diputatuen Kongresuko egungo presidentea edota Jorge Fernandez Diaz Espainiako Barne ministroa proposatuko dituela zabaldu da. Dena den, datorren astean hartuko du erabakia Alderdi Popularrak.

Asteazkenean jakingo da nor izango den Espainiako Diputatuen Kongresuko presidentea. Lehendabiziko bozketan, hautagaietako batek gehiengo absolutua (176 boto) lortu beharko du Kongresuko presidente izendatua izateko. Hala ez bada, bigarren itzulia egingo da boto gehien eskuratu dituzten bi hautagaiekin.

Patxi Lopez Kongresuko presidente izatea baztertu du PPk

Lopez Espainiako Diputatuen Kongresuko presidente izateko PSOEk egindako proposamena baztertu du Fernando Martínez-Maíllo Alderdi Popularreko Antolamendu idazkariordeak. "Gure iritziz, hauteskundeak irabazi dituen alderdiaren esku egon beharko du Kongresuko presidentetzak. Horrela izan da 1978. urteaz geroztik", azpimarratu du PPren egoitzan igande honetan egin duen agerraldian.