Masek, ERCri: 'Aurrekontuak eta hauteskundeak lotzea ulertezina da'

Bere bide orriari eutsi egingo dio Artur Masek, eta, horrenbestez, independentziaren aldeko alderdien zerrenda bateratu bat nahitaezkoa izango da hauteskundeak aurreratzeko. Kataluniako presidenteak ERCrekin dituen ezadostasunak agerian utzi ditu gaur.

“Ulertezina eta inkoherentea litzateke, hiru aste igaro direnean, sinesten dudan horretan aldaketak egitea”, adierazi du gaur Parlamentuko kontrol saioan, Miquel Iceta PSCren idazkariaren galdera bati erantzunez.

ERCrekin hitz egiteko “prest” dagoela esan du, baita gainerako alderdi politikoekin ere. Hauteskundeak 2015eko lehen seihilekora aurreratzea posible dela esan du, betiere erreferenduma egiteko xedearekin. Junquerasi gogoratu dio ez dituela hauteskundeak aurreratuko “egun dauzkagun gehiengoak aldatzeko aurreratu nahi badira”.