Politika -
2013ko sanferminak
Ikurrina jartzeagatik zigortutako lagunek helegitea aurkeztuko dute
“Beste garai bateko eskuin ozpinduenak herritarren askatasun demokratikoak bertan behera utzi nahi ditu”, salatu du Josu Gracia zigortuen bozeramaileak.
Erredakzioa
2013ko sanferminetan txupinazoaren jaurtiketa atzeratu zuten ekintzaileek laster helegitea aurkeztuko dute. Lau zigortuek ikurrina zintzilikatu zuten Iruñeko udaletxearen aurrean.
Iruñeko gai penaletarako 1 epaitegiak lau ekintzaile zigortu zituen urriaren 5ean. 2013ko sanferminen txupinazoari boikota egiteagatik zigortu zituen epaileak. Ikurrina handi bat eseki zuten bost ekintzailek eta bost hilabeteko espetxe-zigorra ezarri zien magistratuak horietako lauri, desordena publikoagatik.
“Aurkezpenerako epeak bete behar ditugu, baina helegitea martxan dago jadanik”, adierazi du Josu Gracia zigortuen bozeramaileak prentsaurrekoan, Iruñean.
“Askatasun demokratikoen urraketa”
Iruñeko gizarte mugimenduetako ordezkariek lagundu dute agerraldian. Epaia arbuiatu du Graciak. Epailea, UPN eta PSN “askatasun demokratikoak urratzen” ari direla salatu du zigortuen bozeramaileak.
“Helburu politikoak lortzeko, beste garai bateko eskuin ozpinduenak herritarren askatasun demokratikoak bertan behera utzi nahi ditu”, erantsi du Graciak.
Bestalde, Nafarroan ekintza bateratuak aurrera eramateko dei egin dute zigortuek. “Beste Iruña baten alde denak batera lan egiteko unea dela argi utzi du gure aurkako sententziak”, azaldu du Graciak.
