Sarek herritarrekin ehundu nahi du sakabanaketari aurre egiteko sarea

Sare euskal presoen eskubideen aldeko plataformak "sarekideak" lortzeko kanpaina abiatu du. Bost euroko ekarpenen bidez, mundu osoan sakabanaketa salatzeko 500.000 libururen argitalpena finantzatu nahi dute.

Ines Osinagak (Gose taldeko abeslaria) eta Kontxita Beitiak (lehenengo ikastolen sustatzailea) hitz egin dute gaur prentsaren aurrean, Sareren izenean, eta "sarekideak" lortzeko kanpainaren berri eman dute.

Horren bitartez "sare bat ehundu" nahi dute, "presoen giza eskubideen urraketa guztiak amaitzearen alde dauden pertsonak protagonista" izan daitezen.

Plataformaren helburu nagusietako bat euskal presoen egoeraren berri "mundu osoan" ematea da, eta, horretarako, sakabanaketaren kontrako milioi erdi liburu argitaratuko dituzte. Ekarpenak jasotzeko formularioa webgunean jarri dute.