Duranek PSCrekin ituna egitea iradoki du, ERC aldenduz gero

Josep Antoni Duran Lleida CiUren Kongresuko bozeramaileak eta Miquel Iceta PSCren buruak elkarrizketak izan dituzte asteotan, eta PSCk CiUri egonkortasuna emateko akordio baten inguruan hitz egin omen dute, ERCk CiUrekin duen akordioa bertan behera uzteko aukerak daudela ikusita.

Icetak Parlamentuko korridorean azaldu duenez, akordio horretarako aukera "oso berde" dago oraindik; izan ere, "Artur Mas Kataluniako presidentearen esku dago, ez Duranen esku".

Buruzagi sozialistak aitortu du harremanak ugariak direla CiUren bozeramailearekin, azkena aurreko astean, eta hasiera batean elkarrizketen helburua CiUren eta PSCren arteko akordioa egitea ez bada ere, gehienetan jorratu duten gaia dela onartu du.

Hala ere, eta PSC Generalitatearekin ituna egiteko prest egon arren, sozialistentzat garrantzitsuenak diren gaiak lehenetsi beharko lituzkeela azpimarratu du: ekonomiaren eta enpleguaren susperraldia; Ongizate Estatuaren babesa; biziberritze politikoa; eta Estatuarekin akordioa egitea adostutako legezko kontsulta bat egiteko.

Duranek gaur goizean bertan adierazi duenez, Masen kontsulta alternatiboa defendatzen du, hasierakoa egiteak legea urratuko lukeelako, eta hori "marra gorria da". Horregatik, Katalunian izango omen da azaroaren 9an, baina legezkoa bada eta balioa badu soilik bozkatuko du.

Bestalde, hauteskundeak aurreratzearen kontra agertu da, Generalitateari egonkortasuna emateko. Horren harira, ERCrekin bada "oso ondo”", eta ERCrekin eta PSCrekin bada "hobeto" izango dela adierazi du.

"ERCk ez badu nahi", ordea, "beste bat bilatu" beharko dutela aitortu du Duranek, eta egoera horri begira kokatzen dira PSCrekin izan dituen elkarrizketak.