Politika -
Izendapena
Rafael Catala, Justizia ministro berria
Orain arte Azpiegituren estatu-idazkaria izan dena datorren astean izango da karguaren jabe.
Erredakzioa
Rafael Catala Polo izango da Justizia ministro berria, gaur egun arte Azpiegituren estatu-idazkaria izan dena, Gobernuko Presidentetzak jakitera eman duenez. Mariano Rajoy Gobernuko presidenteak arratsaldean bertan onartu du Alberto Ruiz-Gallardonen dimisioa.
Rajoyk dagoeneko jakinarazi dio erregeari zein izango den Justizia Miniterioaren buru. Catala karguaren jabe egin arte, Soraya Saenz de Santamaria Gobernuko presidenteordeak hartuko du bere gain ardura hori.
Ruiz-Gallardonen kargu-uztea asteazkenean sartuko da indarrean, Estatuko Aldizkari Ofizialean argitaratzen denean, oharrean irakur daitekeenez.
Catala datorren astean izango da karguaren jabe, Felipe VI.a erregea New Yorken egiten ari den bidaia ofiziala eta Rajoy Txinan egiten ari dena amaitu ostean.
Gobernuko presidenteak Ruiz-Gallardoni “Ministerioaren buru izan den urteotan egindako lana” eskertu dio, “baita Gobernuarekin izan duen lankidetza, guztientzako eskaera handiko arlo batean”.
Catala Polo Justiziako estatu-idazkaria izan zen 2002. eta 2004. urteen artean, eta, gaur egun, Azpiegitura, Garraio eta Etxebizitzako estatu-idazkaria da, Ana Pastor buru duen Sustapen Ministerioan.
