Gipuzkoa, auzitegietara jotzeko prest AHTren 7,5 milioiengatik

Gipuzkoako Aldundiak AHTrekin harremana duten errepideetako obrengatik Eusko Jaurlaritzak eta Gobernu zentralak ordaindu behar diela uste duen 7,5 milioiengatik auzitegietara jotzeko izapidek egiten hasi da. Obra horiek aurreko legealdian egin zituen foru instituzioak.

Ohar batean , Aldundiak “ulergaitzat” jo du Gobernu zentralak eta Eusko Jaurlaritzak “Gipuzkoak duen zorra ez ordaintzea”.

Aldundiak azaldu duenez, eskaera Adifi (Gobernu zentralaren menpe dago) eta ETSri (Eusko Jaurlaritzarekin harremana du) zuzenduta dago.

Aurreko legealdian, Aldundiak (garai hartan EAJk zuzentzen zuen) eta ETSk “ahozko akordio” bat lortu zuten, horren arabera, Aldundiak abiadura handiko trenarekin harremana zuten bide-obrak egin zituen, eta, ordainetan, Euskal Trenbide Sareak 7,5 milioi euro ordaindu behar zizkion.

Bilduren foru gobernuaren hitzetan, “txundigarria da, hitzarmenik sinatu ez arren, obrak Aldundiarentzat 7,5 milioiko kostuarekin egin izana”.

Eusko Jaurlaritzak “oraindik ez du ordaindu, eta ez dirudi ordaintzeko prest dagoenik, diru-kopuru hori Adifi ordaintzea dagokiola esanda”, deitoratu du.