Politika -
Iruñean
Gaixotasunak jota dagoen Ventura Tome presoa askatzea eskatu dute
Emazteak salatu duenez, "txakurren antzera tratatzen dituzte; 40 gradura daude Murtzian, sakabanatuta".
Erredakzioa
Ehunka pertsonak manifestazioa egin dute Iruñean, Etxerat ETAko presoen senideen elkarteak deituta, Ventura Tome preso nafarra askatzea eskatzeko. Tomek minbizia dauka.
Martxa 18:00etan abiatu da autobus geltoki zaharretik, 'Giza eskubideak, konponbidea, bakea. Ventura Tomé eta gaixo dauden presoak etxera' lelopean.
Manifestazioaren buruan osasun langile jantzita joan dira, gaixotasunak dauzkaten ETAko presoak aske geratzea eskatzen zuten kartelekin.
Protestan izan dira Xabier Mikel Errekondo Amaiurreko diputatua, Amaia Izko Sortuko bozeramailea, Bakartxo Ruiz eta Asun Fernández de Garaialde diputatuak eta Igor Arroyo Nafarroako ELAko bozeramailea, besteak beste.
Mobilizazioa hasi aurretik, Cristina Gracia Ventura Tomeren emazteak "arindutako askatasuna" eskatu du senarrarentzat, edo "behintzat, bera eta gaixo dauden gainontzeko presoak hurbiltzea". Tome Murtziako kartzelan dago.
"Txakurren antzera"
"Txakurren antzera tratatzen dituzte; 40 gradutara daude Murtzian, sakabanatuta. Ez du inoiz onkologo berak ikusten, orain esan diote hirugarren minbizi bat berriro sortu zaiola eta onkologoa noiz joango zain dago orain, zer daukan eta nola artatuko duten esateko", azaldu die Graciak kazetariei.
