Ana Agirrek agerraldia egingo du Epsilonen ikerketa batzordean

Porrot egindako Epsilon eta Hiriko proiektuak ikertzeko batzordean agerraldia egin beharko du Ana Agirre Industria sailburu ohiak, Eusko Legebiltzarrean, PPk eskatuta.

Ikerketa batzordeak bilera egin du gaur agerraldi berriak onartzeko. Batzordea formalki apirilaren 1ean osatu zuten.

Epsilon egitasmoak Bat Formulan lehiatzeko helburua zuen eta Hiriko proiektuak auto elektrikoa bultzatu nahi zuen. Bi egitasmoek diru-laguntza publikoak jaso zituzten.

Legebiltzarreko iturriek gaur jakitera eman dutenez, Ana Agirre sailburu ohiaren agerraldia gaur onartu dute, PPk eskatuta. Agirre Industria sailburua izan zen Juan Jose Ibarretxeren Eusko Jaurlaritzan.

EH Bildu

Bestalde, EH Bilduk hiru agerraldi berri eskatu ditu, baina bi bakarrik erregistratzeko aukera du. Behin betiko agerraldiak datozen egunetan erabaki beharko ditu.

Bernabe Unda Industria sailburu ohiaren (Patxi Lopez sozialistaren Gobernuan) eta Unai Rementeria Bizkaiko Aldundiko bozeramailearen agerraldiak proposatu ditu koalizio abertzaleak. Rementeria Denokin enpresako sortzailea izan zen. Hirikok Denokini "lau milioi euro baino gehiago" fakturatu zizkion.

Era berean, Joan Villadeprat Epsiloneko presidenteak eta Jesus Echave Hiriko proiektuaren presidenteak agerraldia egin beharko dute. Gainera, proiektuekin zerikusia izan zuten Eusko Jaurlaritzako arduradunek (aurreko legealdian) agerraldia egin beharko dute.

Batzordearen txostena uztailaren 10ean bozkatzea proposatu dute gaur. Eusko Legebiltzarreko osoko bilkurara irailaren amaieran eramatea espero dute.