Politika -
Europako parlamentua
UPyD ALDEn sartuko da, lurralde batasunaren konpromisoa lortuta
Rosa Diez buru duen alderdiak uste du integrazio horri esker "zerbitzu" bat eskaini ahal izango diola herriari.
Erredakzioa
UPyD alderdiko buru Rosa Diezek gaur iragarri duenez, Europako Liberalen eta Demokraten Aliantzan (ALDE) sartuko da haren taldea. UPyDk, lurralde batasuna babestuz, identitate nazionalari errespetua eskatuz ezarritako baldintza politikoak onartu ditu ALDEk.
Pasatu diren Europako hauteskundeetako emaitzak aztertzeko egin duten Batzar Politikoaren ostean, Europako Parlamentuan ALDErekin osatuko duen taldearen inguruan mintzatu da Diez. Aurreko legealdian, EAJ eta CiU alderdiak ere izan ziren talde horretan.
"Arazoa dutenak EAJ eta CiU dira, ALDEk independentzia eta autodeterminazio eskubidea defendatu ditzan saiatu arren, ez baitute lortu", azpimarratu du politikariak, eta UPyDk lurralde batasuna bermatuko duen konpromisoa hartu duela azaldu du.
Alderdiko buruaren ustez, ALDEren konpromisoa "garrantzitsua eta politikoki oso adierazgarria" da egun Espainian bizi den errealitatearekiko, eta Generalitateko presidente Artur Masek bultzatutako kontsultari egin dio erreferentzia.
UPyDk aurkeztutako baldintza politikoen inguruko erantzuna atzo bertan jaso zutela adierazi du Diezek, eta, hori dela eta, ALDEn sartuko direla, horri esker, herriari "zerbitzu bat" eskaintzeko aukera izango baitute.