Izagirrek eta Garitanok ez zuten dolu-aldia bete, Urquijoren ustez

Carlos Urquijo Gobernuak Euskal Herrian duen ordezkariak Juan Karlos Izagirre Donostiako alkateak eta Martin Garitano Gipuzkoako ahaldun nagusiak Adolfo Suarez Gobernuko presidenteordearen heriotzagatik ezarritako dekretua bete ez zuten aztertzea eskatu dio Fiskaltzari.

Dolu-aldi ofiziala martxoaren 24ko 00:00etatik 26ko 00:00etara bitartean zela zioen Gobernuak bidalitako errege dekretuak, eta bandera nazionala haga erdira jartzea agintzen zuen erakin publiko eta Armadaren ontzi guztietan.

Gobernuak Euskal Herrian duen ordezkariak hainbat paper bidali dizkio Juan Calparsoro Euskal Herriko fiskal nagusiari eta Eduardo Torres Dulce Estatuko fiskal nagusiari, bi erakundeek Espainiako bandera haga erdian jarri ez zutela uste izanda, ezarritako aldian.

Halaber, Donostiako Udalaren kasuan, alkatearen jokaera errege-dekretua "ez betetzeko nahia" izan zitekeela esan du Urquijok, bandera haga erdira jartzeko "legezko betebeharra zein zen bazekielako", eta PSEk eta PPk bozeramaileen batzarrean egindako eskakizuna errefusatu egin zuelako.

Bi alderdi horiek esan zuten Izagirrek uko egin ziola Udaleko idazkariari txosten juridiko bat egitea eskatzeari, dolu ofizialaren harira, Udalak bandera haga erdira jarri behar zuten jakiteko.

Horregatik, gertaerak ikertzea eskatu die bi fiskalei, eta espedienteak irekitzea, hala behar izanez gero.