Politika -
Ertzaintza
Zenon zigortu dute Aresek torturak agindu zituela esateagatik
Euskal presoen abokatua Herrizaingo sailburu ohiaren kontrako kalumniak egiteagatik zigortu dute. 18 hilabetetan 12 euro ordaindu beharko ditu egunero, isun gisa.
Erredakzioa
Epaileak zigortu egin du Alfonso Zenon euskal presoen abokatua Rodolfo Ares Herrizaingo sailburu ohiaren kontra kalumniak egiteagatik. Izan ere, Ondarroan izandako polizia-operazio baten ostean, Zenonek esan zuen Aresek atxilotuak torturatzeko agindua eman ziela ertzainei.
Bilboko epailearen arabera, Zenonek egindakoa Zigor Kodearen 205n artikuluan agertzen da: "Egiarekiko mespretxuz, norbaiti delitu bat leporatzea gezurra dela jakinda ere".
Hori dela eta, Alfonso Zenoni zigorra ezarri dio, eta abokatuak 12 euro ordaindu beharko ditu egunero 18 hilabetez isun gisa, prozesuaren kostua ordaindu beharko du, eta Aresi 5.000 euroko kalte-ordaina eman beharko dio.
Aresek iragarri duenez, diru guztia Gobernuz Kanpoko Erakunde bati emango dio.
Bestalde, sailburu ohia gustura agertu da Justiziak "nire eta Ertzaintzaren kontra egindako salaketak faltsuak zirela berretsi duelako".