Politika -
Polizia-operazioa
ETAren Bizkaia taldearen ustezko laguntzaile bat atxilotu dute Bilbon
Asier Gonzalez da atxilotua. Dima mendian dagoen baserri bat ere erregistratu dute.
Erredakzioa
Guardia Zibilak Asier Gonzalez ETAren Bizkaia taldearen ustezko laguntzailea atxilotu du gaur goizaldean Bilbon, Espainiako albiste-agentziek terrorismoaren kontrako indarretako iturriak aipatuta jakitera eman dutenez.
Atxiloketa goizaldeko ordu biak aldera izan da, atxilotuaren etxebizitzan, Solokoetxen, Zabalbide kalean. Etxeaz gain, garajea ere miatu dute, eta atxilotuaren autoa eraman dute, garabi batean.
Lau ordu eta erdiz etxea miatu ostean, Guardia Zibila eta Gonzalez Soreasu Santutxuko 'herriko tabernara' joan dira, bertan ere miaketa egiteko.
Aipatu iturrien arabera, Bizkaia Taldeak Ezkarain (Errioxa) alokatu zuen etxebizitza batean aurkitu berri duten pendrive bati esker lortu dute ustezko laguntzailearengana iristea.
2008ko uztailaren 22an desegin zuten ETAren Bizkaia taldeari laguntzea leporatzen diote atxilotuari.
Guardia Zibilak Dima mendian dagoen baserri bat erregistratu du
Guardia Zibilak Dima menditik (Bizkaia) gertu dagoen baserri bat erregistratu du, eta Asier Gonzalez bertara eraman dute. Terrorismoaren aurkako iturriek Eferi jakitera eman diotenez, Guardia Zibilaren hamar ibilgailu iritsi dira baserrira, lehergailuen teknikariak eta txakurrak dituzten agenteez gain.
Espainiako Gobernuak lanean jarraituko du
Jorge Fernandez Diaz Barne ministro espainiarrak esan du gaurko atxiloketak agerian uzten duela Gobernuak ETA desegin arte "lanean jarraituko" duela.
Copen egindako adierazpen batzuetan azaldu duenez, ETArekin lotutako ehun atxiloketa egin dituzte legegintzaldi honetan, ETAk ekintza armatuak baztertu bazituen ere.
Ministroarentzat argi dago "Gobernuak ez duela ETArekin negoziatzen", eta gaineratu du "horrela" jarraituko dutela ETA "desegin arte".
Sortu: "PPren Gobernua bakerako bidea bonbardatzen saiatzen ari da"
Maribi Ugarteburu Bizkaiko Sortuko koordinatzaileak azaldu duenez, PPren Gobernua "bakerako bidean bonbardatzen saiatzen ari da, iraganeko eszenatara itzuliz", Asier Gonzalez ETAren Bizkaiko komanduaren ustezko kolaboratzailearen atxiloketarekin.
