Nafarroako Parlamentuak astelehen honetan hasiko du ikerketa batzordea

Nafarroako Parlamentuak astelehen honetan hasiko du Ogasunean izandako ustezko "esku-hartzeak" argitzeko ikerketa batzordea. Azken egunetan, Madrileko PSOE eta PPren arteko eta Nafarroako PSN eta UPNren arteko eztabaida eragin du krisi politiko horrek.

Antonio Hernando PSOEko Autonomia Politikarako eta Erakunde Harremanetarako Idazkariak Mariano Rajoy kritikatu du polemika dela eta Yolanda Barcinari hots egiteagatik.

Hernandoren esanetan, sozialisten lehentasuna ikerketa batzorde horretan lan egitea da orain. Gainera, Gobernuko presidenteak "laguna duen alderdi batetako" agintari bat ustelkeria kasu batean "harrapatzen dutenean", "gaitzetsi ordez, defendatu eta eredutzat jartzen ditu", eta herritarrak horretara ohituta egotea deitoratu du.

Begirada guztiak Barcinarentzat dira orain. Atzo, Foru Poliziak babestuta sartu behar izan zuen Tafallan UPNko kargudunekin egin zuen bilerara. Ekitaldi horretan, Lourdes Goicoechea kontseilariari babesa eman zion eta dimititzeko asmorik ez duela iragarri zuen.

Hotelaren sarreran izandako istiluak gaitzetsi dituzte PSN-PSOEk eta Nafarroako PPk.