Politika -
Euskal ikastetxeak
Biktimak ikastetxeetara eramatea 'hutsegitea' dela esan du EH Bilduk
EH Bilduren hitzetan, oraindik erabateko adostasunik ez duen gai bati irtenbidea emateko erantzukizuna irakaskuntzari egozten zaio horrela.
Erredakzioa
Terrorismoaren biktimak eta poliziaren abusuen biktimak euren testigantza ikasleei helarazteko ikastetxeetara eramatea "hutsegitea" dela adierazi du EH Bilduk, horrela oraindik erabateko adostasunik ez duen gai bati irtenbidea emateko erantzukizuna irakaskuntzari egozten zaiolako.
Koalizioak ohar baten bitartez zabaldu du Eusko Jaurlaritzak bakea eta bizikidetza bultzatzeko garatuko dituen ekimenei buruz duen iritzia. Astearte honetan onartu dute plana.
Besteak beste, plan horrek segurtasun indarren gehiegikeriak jasan dituzten biktimei hezkuntza zentroetara joateko aukera ematen die, terrorismoaren biktimei legez, euren testigantza ikasleei helarazteko. Orain arte, testigantza zuzen horiek ETAren eta beste talde terrorista batzuen kalteak jasan dituztenek soilik ematen zituzten.
EH Bilduren hitzetan, "hutsegite bat da indarkeria politikoaren biktimak ikasgeletara eramatea, oraindik horri buruzko bat-etortzerik lortu ez denean, ez gizartean, ez politikan, ezta instituzioetan ere".
