'Lehendakariak Lizarrara bueltatu nahi badu, PSE aurrean izango du'

Patxi Lopez PSEko idazkari nagusiak adierazi duenez, Iñigo Urkullu lehendakaria estatus politiko berriaz ari denean "Lizarrako Itunera edo Ibarretxen Planera bueltatzeko asmoa du", "zatiketa nagusi zen garaietara", eta hori egiaztatuz gero, lehendakariak PSE aurrean izango duela azpimarratu du Lopezek.

Patxi Lopez Portugaleteko Herriko Etxearen inaugurazioan izan da, eta bertan egindako hitzaldian, Urkulluri Euskadi "ezberdinen artean" eraikitzeko akordioaren aldeko jarrera duela adierazi ziola esan du.

Estatus politiko berriaren xehetasunik eman ez eta hori Eusko Legebiltzarraren kontrako "errespetu falta" dela aurpegiratu dio lehendakariari. Hala ere, hurrengo egunean Radio Euskadin egindako elkarrizketa batean gauzak gehiago zehaztu zituela onartu du. Lehendakariak erabakitzeko eskubidea eta galdeketa aipatu zituen bertan.

"Hizketa gai bakarra"

Halaber, Patxi Lopezek estatus politiko berriaren ingurukoak euskal politikaren "hizketa gai bakarra" bihurtzearen kontra agertu da, "inora ere eramaten ez gaituelako eta gizartearen beharrizanetatik eta lehentasunetatik urruti dagoelako".