Politika -
Elkarrizketa
Armak 'orain' entregatzeko eskatu dio Ortuzarrek ETAri
Espainiako Gobernuarekin negoziazio prozesu bat abiatzea ezinezkoa bada, ETAk ezin du Rajoyren zain egon, buruzagi jeltzalearen arabera.
Erredakzioa
Armak "orain" entregatzeko eskatu dio Andoni Ortuzar EAJren EBBko presidenteak ETAri. "Nahiago badute, utz ditzatela Gipuzkoako Foru Aldundian", gaineratu du.
Edonola ere, EAJ ez da ETAri armak instituzio jakin batean entregatzeko eskatzen ari, Ortuzarren iritziz. "Non uzten dituzten ez du axola. Entregatu ditzatela Gipuzkoako Foru Aldundian, ziur aski, gainerako euskal instituzioak baino atseginagoa irudituko zaielako", nabarmendu du.
Europa Press albiste agentziari eskainitako elkarrizketan hainbat galdera bota ditu: "Negoziaziorik ez badago, ez da desarmerik egongo? Zer esan nahi du horrek, ez dutela eragindako mina aitortuko? Eta ez direla biktimengana gerturatuko?".
Horren ustez, "ezin zaio bake prozesua kudeatzeko giltza Espainiako Gobernuari utzi", eta konponbidea Euskal Herrian egostea proposatu du.
ETAk lehenbailehen entregatu behar dituela armak azpimarratu du, eta pausoak ematen hasteko eskatu dio ETAri. "Une honetan, bakoitzak bere rola bete behar du eta EAJ bere lana egiteko prest dago", adierazi du. Hala ere, prozesuan zeregin nagusia dutenek erantzukizuna bere gain hartu behar dutela uste du.
Bestalde, Donostian, urrian egingo den bake konferentzian parte hartuko dutela adierazi du.
