'Irrigarria litzateke Bake Lantaldea Bildu eta EAJrekin soilik egitea'

Iñaki Oyarzabal Euskadiko PPko idazkari nagusiaren hitzetan, "PSE-EEk Bake Lantaldea utziz gero, barregarria izango litzateke Lantaldeak aurrera egitea EAJrekin eta EH Bildurekin bakarrik". Halaber, "datozen hilabeteetan sozialistak auzi honekin zoratuko dira", iragarri du.

Oyarzabalen aburuz, "oso larria da Eusko Jaurlaritzako Bakerako eta Elkarbizitzarako Planak ezker abertzalearen justifikaziorako balio izatea, eta mingarria da biktimak eta hiltzaileak ia maila berean jartzea".

"Azkenean, orain arte ikusitakoak arrazoia eman digu. Heldu bezain laster, Bildu presoei eta aldarrikapen subiranoei buruz hitz egiten hasi da. PSE-EE noraezean dabil, eta ez daki oso ondo zein den bere zeregina", adierazi du PPko buruzagiak.

Oyarzabalek azaldu duenez, "Bake Lantaldea uzteak zorabioa eragiten die sozialistei, baina badakite bakarrik Batasunaren asmoei arnasa ematen ari dietela, Batasuna horrek agenda politikoa zehazteko erabili nahi duelako Lantaldea".

"Epe laburrera ez dut uste PP Lantaldean sartuko denik, baldintzak aldatu ez dituztelako", adierazi du. "Ez dira aurrerapausorik izan, ondorioz, hilketak gaitzesten ez dituzten lagunekin akordioren bat lotzeko gai den galdetu diogu EAJri", gaineratu du Euskadiko PPko buruak.