EH Bilduk 'zehaztasun' handiagoa eskatu dio Urkulluri

EH Bilduk proposamen "sakonak eta zehatzak" eskatu dizkio Eusko Jaurlaritzari eta gizartearen "larrialdi-egoerak" politika "hizki handiz" egitea eskatzen duela azpimarratu du, Madrilgo Gobernuaren "inposaketen" aurrean erabakiak hartzeko.

Maribi Ugarteburu EH Bilduko legebiltzarkideak, Unai Ziarreta EAko kidearekin batera eman duen prentsaurrekoan, Iñigo Urkulluk alderdiekin izandako bileraren inguruko balorazioa egin du.

EH Bilduk bilerara jarrera "konstruktiboa" eraman zuela ziurtatu du Ugarteburuk eta bilera egin izana soilik "ona" dela adierazi du, baina, batzar hori "berandu" egin dela azpimarratu du. "EAJk bost hilabete galdu ditu harrokerian murgilduta", azaldu du.

Halaber, Jaurlaritzak "alderdiekin bakarrik ez" sindikatu eta gizarte eragile guztiekin hitz egin behar duela nabarmendu dute koalizioko kideek, eta Jaurlaritzari mahai gainean proposamen "zehatzak eta sakonak" jartzeko eskatu diote eta ez "ibilbide gutxiko partxeak".

Hala, Ugarteburuk erreforma fiskal "sakon" baten eta enplegua sustatuko duten inbertsioen aldeko apustua egin du, eta EAEn 160.000 pertsona baino gehiago langabezian daudela ekarri du gogora.