Politika -
Egonkortasun ituna
'Irtenbideak emateko' asmoz joango da PSE-EE Urkulluren bilerara
PSE-EE "Urkulluren proposamenak zeintzuk diren entzuteko" joango dela esan du Aresek, baina "akordio handi bat" proposatuko duela iragarri du.
Erredakzioa
Rodolfo Ares PSE-EEren Antolakuntza idazkariak adierazi duenez, Iñigo Urkulluk egonkortasun ituna lortzeko deitu duen bilerara "irtenbideak emateko" asmoz joango dira, nahiz eta zalantzan jarri duen "akordioak lortzeko 'photocall'aren politika egokiena denik".
Ser irrati katean egindako elkarrizketa batean esan du "Urkulluren proposamenak zeintzuk diren entzuteko" joango direla; izan ere, "horren Gobernuari dagokio neurri zehatzak hartzea eta egin nahi duten akordio handi hori lortzea", adierazi du.
PSE-EEk "akordio handi bat" proposatuko du, besteak beste, ekonomia suspertzeko, enplegua sortzeko, zerbitzu publikoak defendatzeko, erakunde sarea erreformatzeko eta iruzurraren aurkako borroka ekingo duen zerga sistema justuagoa lortzeko.
EAJk bidea aukeratu behar duela esan du Aresek, hau da, "PPren murrizketen bidea edo herrialdeak behar dituen aldaketena". Horren iritziz, "argi dago PSE-EEk defendatzen duena ez datorrela PPk nahi duenarekin bat" eta Jaurlaritzatik "Rajoyren murrizketak defendatzen ari zirelako" joan zirela ekarri du gogora.
