Erkoreka: 'EH Bildu izan da akordioetatik kanpo geratu dena'

Akordioetatik kanpo geratu dena EH Bildu bera izan dela esan du gaur Josu Erkoreka Eusko Jaurlaritzako bozeramaileak. Gaineratu duenez, maiatzaren 30erako deitutako greba orokorrak “Jaurlaritzako aldatzeko” deia egin du, eta EH Bilduk greba horren alde egingo du. Bestalde, Erkorekak esan du ez dutela “koalizio itunik” sinatzea espero, baina ez dutela “aukerarik baztertzen”.

Lehendakariak “bi motatako itunak” proposatu dituela zehaztu du Erkorekak: “egonkortasunerako ituna eta herrialde mailakoa”. Herrialde mailako itunaren inguruan, bertan parte hartzera alderdi politiko guztiak gonbidatu dituela esan du, “denak beharrezkoak direlako eta euren parte-hartzea nahitaezkoa delako elkarbizitza artikulatzeko oinarriak eraikitzeko”.

Egonkortasun itunaren inguruan, lehendakariak “bereziki PSE eta PP” gonbidatu zituela onartu du Erkorekak, baina EH Bilduk Jaurlaritzaren eta EAJren proposamenei “hiru ezezko borobilekin” erantzun dietela kritikatu du.

“Lehenengo ezezko biribila iragan urrian eman zuten, hauteskundeen ondoren, legealdirako itunen inguruan. Bigarrena Aurrekontuei eman zieten, eta hirugarren ezezkoa lehendakariak talde parlamentarioei emandako dokumentuaren aurrean eman zuten”, adierazi du.

“Hiru ezezko horiekin, EH Bildu izan da bere burua akordioetatik kanpo utzi duena. Jaurlaritzak ez du EH Bildu baztertu, koalizio hori izan da bazterketa horren erantzule. Hiru ezezko biribil horiekin emateaz gain, maiatzaren 30eko greba orokorrarekin bat egin du”, adierazi du.