Europak zorroztasuna eskatu dio Espainiari, torturak galarazteko

Tortura Prebenitzeko Europako Kontseiluaren Batzordeak (CPT) zorroztasun handiagoa eskatu die Espainiako agintariei, Segurtasun Indarrek eta espetxe funtzionarioek atxilotutakoei torturak eta tratu txarrak ematea galarazteko.

CPTren ordezkaritza bat Espainiako Estatuan izan zen 2011. urteko maiatzaren 30etik ekainaren 13ra, eta txosten bat egin du, ondorioak eta aholkuak bilduta. Horretan, tratu txarren aurrean "zero tolerantzia" izateko deia egin dute.

Tortura Prebenitzeko Batzordeak Guardia Zibila aipatu du bereziki, eta Madrilen duen inkomunikazio unitatea bisitatzea galarazi izana salatu du. 2007. urtean ere eragotzi zieten bisita.

Radio Euskadik jakin izan duenez, Batzordeak ETAko kide izatea egotzita atxilotutako 11 pertsonarekin hitz egin zuen, eta tortura zantzu sinesgarriak atzeman zituen 10 kasutan.

Txostenak kolpeak, 'poltsa' eta beste hainbat tortura praktika eta sexu eraso bat aipatu ditu.

Tratu txarren helburua, betiere Batzordeko kideen hitzetan, adierazpen sinatu bat lortzea da, ahozko saiora begira.

CPTren ordezkariak hainbat komisariatan izan ziren, tartean Ertzaintzaren egoitza nagusian, Arkautin (Araba), eta makilak eta beisbol bateak aurkitu zituzten Cadizko eta Madrilgo bi galdeketa gelatan.

Horren ildotik, Segurtasun Indarren galdeketak "legeetatik kanpo" egon ohi direla salatu dute.

Bestalde, Batzordeak inkomunikazioa "salbuespen neurria" izan beharko litzatekeela eta erabilera "mugatuta" egon beharko litzatekeela nabarmendu du.

CPTk inkomunikatutakoek hasiera-hasieratik abokatua izatea gomendatu du.