Politika -
Aldaketa estatutuetan
PSOEk barne hauteskundeen bidez hautatuko du idazkari nagusia
Orain arte, hauteskundeetako hautagaiak aukeratzeko baino ez dituzte erabili primarioak alderdi sozialistan.
Erredakzioa
Oscar Lopez PSOEko Antolakuntza idazkariak alderdiaren estatutuak aldatzea proposatuko du barne organoetan, idazkari nagusia modu zuzenean primarioen bidez hautatu ahal izateko.
Lopezek Forum Europa gosari informatiboan parte hartu du, Elena Valenciano PSOEko idazkariorde nagusiarekin batera, eta bertan egin du iragarpena.
Orain arte, hauteskundeetako hautagaiak aukeratzeko erabili izan dituzte barne hauteskundeak PSOEn, baina estatutuetan ez dute aurrez ikusi horrela idazkari nagusiak ere hautatu ahal izatea.
Duela aste batzuk, Galiziako PSOEk bere idazkari nagusia primarioen bidez hautatzeko prozesua abiatu zuen, eta zuzendaritza federalak aukera hori estatutuetan jasota ez dagoela ohartarazi zion.
Horren ildotik, lurralde zuzendaritzek alderdiaren arauak aldatzeko gaitasunik ez dutela ohartarazi du Oscar Lopezek, eta, hortaz, alderdiaren estatutuak aldatu arte itxarotea eskatu die Galiziako sozialistei.
