Cabacas auziarekin lotutako sei ertzain kargutik kendu dituzte

Eusko Jaurlaritzako Segurtasun Sailak Iñigo Cabacas athleticzalearen heriotza eragin zuten gertaerekin lotutako sei ertzaina kargutik kendu ditu, Radio Euskadik jakin izan duenez. Bilboko hiriguneko polizia-operazioan parte hartu zuten sei agente dira. Sailak kargutik kentzea erabaki du, aste honetan ezagutu diren grabazioek agenteen lana baldintzatzen dutela iritzita.

Radio Euskadik jakin ahal izan duenez, Estefania Beltran de Herediak gidatzen duen Sailak agenteei erabakiaren berri eman die dagoeneko eta Ertzaintzaren sindikatuei berehala jakinaraztea espero du.

Cabacasek pilotakada bat jaso zuen gertaerak izan zirenetik urtebetera, Justizia gertatutakoa ikertzen ari da. Iñigo Urkullu lehendakariak aurreko asteazkenean esan zuenez, Cabacasen heriotza "konponbiderik gabeko akatsa" izan zen.

Aste honetan hedabide batek grabazioen zati bat argitaratzearen ondorioz, Segurtasun Sailak adierazi du, ohar baten bidez, inoiz ez duela "epailearen ikerketarekiko paraleloan egiten diren hedabideen judizioetan parte hartuko". Hala ere, "ikerketen sekretuak babesten dituen grabazioen zati bat argitaratu izanak ekintzetan parte hartu zuten funtzionario publikoen ohiko lana baldintzatzen du", azaldu du.

Segurtasun Sailak babesa adierazi die berriz ere egunero pertsona guztien zerbitzura lan egiten duten Ertzaintzako gizonei eta emakumeei, joan den asteazkenean Ertzaintzaren Batzordean egin zuen bezala, eta segurtasuneko zerbitzu publikoa hobetzeko egiten duten lana nabarmendu nahi du.

"Iñigo Cabacasen heriotza akats konponezina da, horren ondorioz, Ertzaintzak jarduteko protokoloak berrikusi ditu, baliabide materialak ordezkatu ditu eta trebakuntza-jarduerak birdiseinatuko ditu", esan du Segurtasuneko sailburuak. Gainera, gogorarazi du bost ertzain epailearekin lanean ari direla gertatutakoak argitzeko.

Segurtasun Sailak epailearen ikerketarekin elkarlanean jarraitzeko prest dagoela azaldu du berriz ere. "2012ko apirilaren 5eko gauan Bilbon gertatutakoak ikertzen dituen epaileari dagokio frogatutako gertaerak eta, beharrezkoa izanez gero, balizko inputazioak eta arduradunak zehaztea", azaldu du sailburuak.