Politika -
Donostia
Segikoak izateagatik zigortutakoek ez dute Gorenaren epaia onartzen
"Kostako zaie gu eramatea" adierazi dute auzipetuek prentsaurreko batean. Datorren larunbaterako manifestazioa deitu dute Donostian.
Erredakzioa
Segiko kideak izatea egotzita seina urteko espetxe zigorrera kondenatu dituzten zortzi gazteek Auzitegi Gorenaren epaia ez dutela onartzen adierazi dute goizean Donostian egin duten agerraldian. Epaia ez dutela onartzen irudikatzeko epaiaren kopia apurtu dute bertan.
Aitor Olaizola, auzipetutako gazteetako batek, Donostiako Boulevardean emandako prentsaurrekoan adierazi du, ez dutela onartzen "epai zikin" hori, eta ez diotela "zilegitasunik" ematen.
Horren ustez, Auzitegi Gorenaren epaiak "Estatu espainiarraren izate faszista agerian uzten du".
"Kostako zaie gu eramatea", esan du Olaizolak, eta gainerako auzipetuekin batera, epaiaren kopia bat apurtu du.
Manifestazioa
Txerra Bolinagak ere, Eleak mugimenduko bozeramaileak, Gorenaren epaia gaitzetsi du eta datorren larunbaterako manifestazioa deitu dute Donostian. Auzitegi Gorenaren epaiaren kontrako martxa 17:00etan abiatuko da Donostiako Boulevardetik.
