PPk Aurrekontuak negoziatuko ditu, baina osoko zuzenketa baztertu gabe

PP Ricardo Gatzagaetxebarria Eusko Jaurlaritzako Ogasun sailburuarekin bilduko da datorren astean 2013ko Aurrekontuak negoziatzeko; baina, bitartean, osoko zuzenketa prestatuko du, oraindik kontuen kontra ez bozkatzeko arrazoirik ikusten ez duelako.

Anton Damborenean PPren Bizkaiko buru eta ekonomia alorreko bozeramaileak Bilbon emandako prentsaurreko batean azaldu duenez, Eusko Jaurlaritzak ez du Aurrekontuak onartzeko babesa lortzeko "benetako asmoa", eta "badirudi oso eroso" dagoela 2012koak luzatzeko aurreikuspenarekin.

Danborenearen esanetan, EAJk aurkeztutako proiektua ez da errealista diru-sarrerei eta gastuari dagokienez; izan ere, lehenengo kasuan, behera egin dute lehenengo bi hilabeteetan eta, bigarren kasuan, Diru-sarrerak Bermatzeko Errenta emateko diru-laguntzak handitu egingo dira.

Gainera, ekonomia eta enplegua sustatzeko eta administrazioa murrizteko neurririk ez dagoela salatu du. Era berean, "sasienbaxadei" eta Iparraldeko ikastolen laguntzei eusten diela kritikatu du.

"Aurrekontu hau ez da gurea eta ez dugu gogoko", azpimarratu du PPren bozeramaileak, PPren babesa lortzeko EAJk eta Jaurlaritzak proposamenik ez dietela egin jakinarazi aurretik.