Lokarrik partaidetzarako espazioak eskainiko ditu bakea lortzeko

Lokarrik, akordioaren eta kontsultaren aldeko herritarren sareak, joan den astean Iruñean eta Bilbon bakea bultzatzeko foroa egin ostean, partaidetza bultzatzeko espazioak eskainiko dituela iragarri du. Izan ere, elkarte horretako kideen ustez, "herritarrak beharrezkoak dira Euskadin bake justua eta iraunkorra lortzeko".

Aipatu foroa Lokarrik antolatu zuen, Bake Bidean erakundearekin batera, besteak beste. Komunikatu batean, Lokarrik ekimen horren balantzea "oso ona" izan dela esan du. Izan ere, foroan 600 pertsonak hartu zuten parte, eta lepo egon zen.

Halaber, 400 pertsonak baino gehiagok internetez zuzenean jarraitu zuten, forosocialpaz.org webgunearen bidez. Guztira, norbanakoen zein taldeen 500 ekarpen baino gehiago bildu dituzte dagoeneko. Hala, horiek jasotzeko epea luzatuko dute hilabete amaierara arte.

Bestalde, Lokarrik foroan parte hartu duten adituek egindako txostenen "maila altua" nabarmendu du. Izan ere, ikuspegi berriak, esperientziak, oinarriak eta irizpideak aurkeztu dituztela eta erabilpen handikoak izan daitezkeela azaldu dute, "bake prozesuak gainditu beharko dituen erronkei buruzko gogoetak sakontzeko".

Gaurtik aurrera, bakea bultzatzeko foroa antolatu duten erakundeak eta bertan parte hartu duten txostengileak ondorioak bilduko dituen dokumentu bat osatzeko lanetan arituko dira. Espero dutenez, apirilaren amaieran publiko egingo dituzte emaitzak.