Torturak salatu zituen Segiko gazte bati babes eskaera ukatu diote

Auzitegi Konstituzionalak Segiko gazte baten interesen aurkako epaia eman du; izan ere, gazteak babes judizial egokirako eskubidea urratu ziotela salatu zuen 2010. urtean, atxilotu eta gero torturak jasan zituela argudiatuta.

Aritz Petralandak babes eskeko helegitea eskatu zuen eta Konstituzionalak ukatu egin dio.

2010. urteko azaroaren 24an atxilotu zuten gaztea Segiren aurkako operazio batean.

Epaiak bi epaileren aurkako bi boto izan ditu eta beste seik alde bozkatu dute. Bi epaile horien arabera, torturen salaketaren ostean, Bizkaiko Auzitegiak batetik eta instrukziozko epaitegiak bestetik "ez zuten ikerketa judizial eraginkorrik egin" eta "ez zituzten erabili edozein zalantza argitzeko eskura zituzten froga guztiak".

Atxilotu eta hiru hilabetera, Polizia Nazionalak Bilboko polizia-etxean eta Madrileko Auzitegi Nazionalera eraman zutenean torturatu egin zuela salatu zuen Petralandak.

Froga gisa, polizia-etxeko kameren grabazioak erabiltzeko eskatu zuen gazteak, baina Polizia Nazionalak esan zuenez, ez zen grabaziorik egon.

2011ko urtarrilean, babes eskeko helegitea jarri zuen Konstituzionalean, Probintzia Auzitegiaren aurka, azken honek torturak eta tratu txarrak ukatu baitzituen.

Konstituzionalak helegitea onartu zuen eta gertaerak aztertu eta gero, atxiloketaren ostean, "beldur giroa zegoela eta salaketa jarri zuenaren ahultasun egoera areagotu zela" ondorioztatu du. Mediku txostenetan ez dagoela tratu txarren zantzurik ondorioztatu dute, eta ondorioz, Konstituzionalak Petralandaren babes eskeko helegitea bertan behera utzi du.